ओखलढुंगा । शुक्रबार अचानक प्रहरी आफ्नो घरमा आएको देखेर खोटाङको जन्तेढुंगाका मानबहादुर विक अचम्मित भए । प्रहरी निरीक्षक राजु निरौलले नमस्कार गर्दै उनको हालखबर सोधेपछि उनलाई थप कौतुहलता जाग्यो ।
२०७४ सालमा उनकी श्रीमतीको हत्या भएको थियो । अहिलेसम्म आरोपितको न पहिचान भएको छ, न समातिएका छन् । उनलाई प्रहरी घरैमा आएर सोधिखोजी गर्दा न्याय पाइने आश जागेको छ ।
उनले हत्यारालाई कारवाही हुने आश मारिसकेका रहेछन् । प्रहरी घरैमा आएर सोधिखोजी गर्ने कुरा कल्पना समेत नगरेको बताए । उक्त घटनाका पीडितको घरमा प्रहरी ‘पीडितसँग पुनः भेटघाट’ (भिक्टिम रि–भिजिट) कार्यक्रम अन्र्तगत पुगेको थियो । यसले पीडितलाई न्याय पाइने आश पनि जगाएको छ ।
हलेसी, कात्तिकेकी जेष्ठ नागरिक सानिका राईलाई प्रहरी आइपुग्दा पुरानो घटनाले झस्कायो । उनीमाथि ज्यान मार्ने उद्योग गर्ने आरोपित जेलमा छन् । उनको सामाजिक अवस्था बुझ्न प्रहरी शुक्रबार पुगेको थियो । अपराध पीडित नागरिकको सामाजिकीकरणको अवस्थाका बारेमा बुझ्न प्रहरी घर घरै जान थालेको छ । यसबाट पीडितहरुको मनोबल बढ्ने र अपराध अनुसन्धानमा थप सहयोग पुग्ने प्रहरीको विश्वास छ ।
जिल्ला प्रहरी कार्यालय खोटाङले प्रदेश प्रहरी कार्यालय विराटनगरबाट अनुमति लिएर ‘पीडितसँग पुनः भेटघाट’ कार्यक्रम शुरु गरेको छ । जिल्लाका १० स्थानीय तहमा ११ जना फोकल पर्सन तोकर कार्यक्रम शुरु गरिएको जिल्ला प्रहरी कार्यालय खोटाङका डिएस्पी मञ्जिल मुकारुङले बताए ।
प्रहरीले तराइका केही जिल्लामा यस्ता कार्यक्रम विगतमा ल्याए पनि पहाडी जिल्लामा भने पहिलो पटक शुरु गरिएको छ । यस्ता कार्यक्रमले पीडितलाई राज्यले हेर्दै छ है भन्ने भरोसा हुने र अपराध अनुसन्धानका लागि सुचना प्राप्त हुने, स्थानीय भूगोल र सामाजिक अवस्थितिका बारेमा पनि जानकारी सहज रुपमा प्राप्त हुने डिएस्पी मुकारुङको भनाइ छ । प्रहरीले शुक्रबार मात्रै ३४ जना पीडितहरुलाई भेटघाट गरेर अपराध अनुसन्धानको अवस्था र न्यायिक प्रकृयाका बारेमा समेत जानकारी गराएको छ ।
प्रहरीबाट आफू विरुद्ध हत्या प्रयास गरेका आरोपित भदौमा छुट्न लागेको जानकारी पाएकी हलेसीकी सानिका राईले जेलबाट छुटेपछि ती आरोपितबाट आफु असुरक्षित हुने अवस्था रहने भन्दै सुरक्षा प्रबन्ध गर्न अनुरोध गरेकी छिन् । प्रहरीले सुरक्षाको सुनिश्चिता गर्ने प्रतिबद्धता जनाएर फर्किएको छ । भिक्टिम रि भिजिटमा प्रहरीले बलात्कार तथा यौनजन्य हिंसाका पीडितहरुलाई भने गोपनियता भंग हुने भएकाले भेटघाट गरेको छैन ।
अभियानले नागरिक–प्रहरी सम्बन्ध विस्तारमा महत्वपूर्ण योगदान पुग्ने र प्रहरीले हाम्रो पक्षमा काम गरिरहेको छ भन्ने सन्देश प्रवाह हुने कोशी प्रदेशका डिआइजी राजेशनाथ बास्तोलाले बताए । खोटाङबाट परिक्षणका रुपमा शुरु गरिएको कार्यक्रम प्रभावकारी देखिएकाले अर्को हप्ताबाट अन्य जिल्लाहरुमा विस्तार गरिने पनि डिआइजी बास्तोलाले जानकारी दिए ।
घटना घट्दा तत्काल सुवत प्रमाण र घटनाको पृष्ठभूमिमा केन्द्रित हुने प्रहरी त्यसपछि फर्किएर नजाँदा त्रसित भइरहने पीडितको पछिल्लो अवस्था थाहा पाउन यस्ता कार्यक्रम प्रभावकारी हुने स्थानीय बताउँछन् । बेलाबेलामा पीडितसँग भेटघाट गर्दा पीडामा रहेलाई सान्त्वना प्राप्त हुने, अनुसन्धानमा थप कुरा पत्ता लाउन पनि सहयोग पुग्ने अपेक्षा लिइएको छ । यस्ता कार्यक्रमले प्रहरी गाउँ गाउँमा पुगिरहने भएकाले अपराधका घटना पनि कम हुने सरोकारबालाको भनाइ छ ।
-1730564212.jpg)
