ओखलढुंगा । तस्बिरमा सबैजना मुसुक्क मुस्कुराएका छन् । ग्लोब्स लगाएका केही हातहरू भीडको बीचमा रहेकी एकजना महिलाको मुखतिर तेर्सिएका छन् । उनको मुखमा औँला कोचिरहेका छन् । ती महिला सकी नसकी मुख बाइरहेकी छिन् । औँलाको कोचाइँबाट उनको अनुहारमा पीडा प्रष्ट झल्किएको देख्न देखिन्छ ।
मंगलबारदेखि फेसबुकमा भाइरल भइरहेको याे तस्बिर हो ओखलढुंगाको चम्पादेवी गाउँपालिकाले आयोजना गरेको जेष्ठ नागरिक दन्त उपहार शिविर उद्घाटन कार्यक्रमको । उद्घाटनस्थल थियो चम्पादेवीकै घोराखोरी । गएको सोमबार शिविर उद्घाटनमा डाँकिएका थिए, प्रदेश १ का सामाजिक विकास राज्यमन्त्री जसमाया गजमेर र प्रदेश १ कै अर्थ समिति सभापति एवं ओखलढुंगाका प्रदेशसभा सदस्य मोहन खड्का । शिविरमै थिए गाउँपालिका अध्यक्ष नवराज केसी र अरु जनप्रतिनिधि तथा कर्मचारीहरू ।
महिलाको मुखमा दाँत कोचेर राज्यमन्त्री र जनप्रतिनिधिहरुले उद्घाटन गर्दैगर्दाको तस्बिर फेसबुकमा निकै आलोचित भएको छ । अनिल गिरीले फेसुबकमा फोटोसहितको स्टाटसमा लेखेका छन्- 'विरामीको दाँत ठेलेर दन्त शिविर उद्घाटन । नसकिने भो यो देशका जनप्रतिनिधिहरुसँग ।' उनको स्टाटस दर्जनौँ पटक शेयर भएको छ । गिरीको स्टाटसमा चर्को आलोचनासहितका प्रतिक्रिया देख्न सकिन्छ । जितमान बस्नेतले लेखेका छन्, 'थिचेर मार्नै लागेछन्, गाँठे! बिचरा बिरामी!' ओम राईले लेखेका छन्, 'कहीँ नभएको जात्रा हाँडी गाउँमा ।'
तस्बिर हेरेर केहीले व्यंग्य समेत गरेका छन् । मिडिया विश्लेषक भानुभक्त आचार्य लेख्छन्, 'विरामीको दाँत ठेलेर दन्त शिविर उद्घाटन रे । मुत्रनली अपरेसनको उद्घाटन गर्नु परे यिनले के गर्दा हुन् ? विचरा हाम्रा जनप्रतिनिधि ।' सीआईएनमा कार्यरत पत्रकार राजन रुचाल लेख्छन्, 'हो अब ओखलढुंगा हो, ओखलढुंगाले गर्छ ! के गर्छ त भन्दा बिरामीको दांत ठेलेर दन्त शिविरको उद्घाटन गर्ने काम गर्छ ।'
फेसबुकमै ईश्वर रौनियारले लेखेका छन्, 'पाइल्सको उपचार शिविर उद्घाटन गर्न परेको भए यी जनप्रतिनिधिले के गर्थे होलान्, संझँदै तरंगित छु म ।' दिनेश पौडेलले भनेका छन्, 'अझ सर्जरी क्याम्प भए त खुकुरी बोकेर जाइलाग्थे होलान् ।'
दन्त शिविर आफैँमा नराम्रो कार्यक्रम थिएन । गाउँपालिकाले सबै वृद्धवृद्धाहरूको मुहारमा मुस्कान भर्नका लागि यो कार्यक्रम ल्याएको जनाएको छ । घोराखोरी र पलापुमा शिविर राखेर गाउँपालिकाले ६० वर्ष माथिका दाँत झरेका वृद्धवृद्धाहरुलाई नि:शुल्क दाँत सेट लगाइदिने, सबै उमेर समूहका नागरिकलाई निशुल्क खुद्रा दाँत लगाइदिने, दाँत निकाल्ने तथा परामर्श दिने व्यवस्था मिलाएको छ । नौलो तरिकाले उद्घाटन कार्यक्रम गर्न खोज्दा 'लाटो लड्छ एक बल्ड्याङ, बाठो लड्छ सय बल्ड्याङ' भनेझैँ मात्रै भएको हो ।
यो पनि पढ्नुहोस्
चम्पादेवीमा एकैसाथ जेष्ठ नागरिक दन्त उपहार र कोरोना सम्बन्धी सचेतना कार्यक्रम
-1730564212.jpg)
