ओखलढुङ्गा । ओखलढुङ्गाको मोलुङ गाउँपालिकाले समुदायमा आधारित पुनर्स्थापना सहजकर्ता पदका लागि दरखास्त आह्वान गरेको छ। कोशी प्रदेश सरकार, सामाजिक विकास मन्त्रालय र साझेदार संस्थासँगको लागत साझेदारीमा सञ्चालित अपाङ्गता रोकथाम तथा पुनःस्थापना कार्यक्रमका लागि आवश्यक जनशक्ति खुला प्रतिस्पर्धात्मक परीक्षाद्वारा करार सेवामा पदपूर्ति गरिने गाउँपालिकाले जनाएको छ।
इच्छुक नेपाली नागरिकले तोकिएको दरखास्त फाराममा आवश्यक विवरण भरी पासपोर्ट साइजको दुई प्रति फोटो टाँस गरी गाउँपालिकाको कार्यालयमा आवेदन दिनुपर्नेछ। साथै, नागरिकता प्रमाणपत्र, शैक्षिक योग्यताको ट्रान्सक्रिप्ट, चारित्रिक प्रमाणपत्र, परीक्षा दस्तुर बुझाएको बैंक भौचरको अर्धकट्टी तथा नेपाल बाहेक अन्य मुलुकबाट प्राप्त शैक्षिक प्रमाणपत्र भएमा त्रिभुवन विश्वविद्यालयबाट समकक्षता निर्धारण गरिएको प्रमाणपत्र संलग्न गर्नुपर्नेछ। दरखास्त पेश गर्ने समयावधि फागुन २५ गतेदेखि चैत १० गतेसम्म तोकिएको छ।
उक्त पदका लागि उम्मेदवारले न्यूनतम कक्षा १२ वा सो सरह उत्तीर्ण गरेको हुनुपर्नेछ। पुरुष उम्मेदवारका लागि १८ वर्ष पूरा भई ३५ वर्ष ननाघेको तथा महिला र अपाङ्गता भएका व्यक्तिहरूका लागि १८ वर्ष पूरा भई ४० वर्ष ननाघेको हुनुपर्ने जनाइएको छ। साथै, उम्मेदवार स्थानीय तहका स्थायी बासिन्दा हुनुपर्ने भए पनि योग्य उम्मेदवार नपाएमा जिल्लाका अन्य स्थानीय तहका योग्य उम्मेदवारहरूलाई समेत छनोट प्रक्रियामा समावेश गरिने बताइएको छ।
नियमित रूपमा फिल्डमा गई कार्य गर्न सक्ने, अपाङ्गता भएका व्यक्तिहरूको घरमै गई परामर्श, सहजीकरण तथा समन्वय गर्न सक्ने, साथै कम्प्युटर तथा कागजी रूपमा तथ्याङ्क व्यवस्थापन र प्रतिवेदन तयार गर्न सक्ने उम्मेदवार छनोट गरिने गाउँपालिकाले जनाएको छ। करार सेवामा नियुक्त हुने उम्मेदवारको सेवा सुविधासम्बन्धी शर्त करार सम्झौतामा उल्लेख गरिनेछ।
छनोट प्रक्रिया अन्तर्गत लिखित परीक्षा, कम्प्युटर सीप परीक्षण तथा प्रत्यक्ष अन्तर्वार्ता हुनेछ। परीक्षा दस्तुर ४०० रुपैयाँ तोकिएको छ। दरखास्त फाराम मोलुङ गाउँपालिकाको कार्यालयबाट प्राप्त गर्न सकिनेछ। साथै, दरखास्तहरू स्वीकृत वा अस्वीकृत गर्ने सम्पूर्ण अधिकार गाउँपालिकाले राख्नेछ भने झुटा विवरण प्रस्तुत गर्ने उम्मेदवार स्वयं जवाफदेही हुनेछन्।
