ओखलढुङ्गा । उज्यालो इनर्जी सोलुसन प्रा. लि. काठमाडौले प्रस्ताव गरेको लिखु खोला जलविद्युत आयोजना (३६ मेगावाट) को प्रारम्भिक वातावरणीय परीक्षण प्रतिवेदनसँग सम्बन्धित सार्वजनिक सुनुवाई कार्यक्रम आयोजना गर्न लागेको छ। यो कार्यक्रम वातावरणीय प्रभाव मूल्याङ्कन गर्न र स्थानीय सरोकारवालाको राय र सुझाव प्राप्त गर्नका लागि आयोजना गरिएको हो।
उक्त आयोजना को परिधि बागमती प्रदेशको रामेछाप र कोशी प्रदेशको ओखलढुङ्गा जिल्लामा पर्ने लिखु खोलामा प्रस्ताव गरिएको छ। परियोजना Peaking Run-of-River (PROR) प्रकारको छ र यसको बाँध गेटेड ड्याम प्रकारको प्रस्ताव गरिएको छ। यस आयोजना बाट वार्षिक २१८.०९ गिगावाट आवर ऊर्जा उत्पादन हुने अनुमान गरिएको छ।
सार्वजनिक सुनुवाई कार्यक्रमको मिति र स्थान यस प्रकार निर्धारण गरिएको छ। चैत २६ मा श्री जलकन्या आ.वि., चम्पादेवी गाउँपालिका वडा नं. ३, सिल्खुवेशी, ओखलढुङ्गामा बिहान ११ बजे, चैत २७ मा लिखु गाउँपालिका वडा नं. १, नौविसे, ओखलढुङ्गामा बिहान ११ बजे र चैत २८ मा श्री श्रीकृष्ण आ.वि., रामेछाप नगरपालिका वडा नं. ४, कुशवसेरी, रामेछापमा बिहान ११ बजे आयोजना गरिने छ।
उज्ज्यालो इनर्जी सोलुसन प्रा.लि.ले प्रभावित गाउँपालिका र नगरपालिका, सरकारी र गैरसरकारी संघसंस्था, विद्यालय, स्वास्थ्य चौकी, र अन्य सरोकारवालालाई उपस्थित भइ अमुल्य राय र सुझाव दिनका लागि अनुरोध गरेको छ।
यस कार्यक्रमको मुख्य उद्देश्य, आयोजनासँग सम्बन्धित विभिन्न पक्षहरूको बारेमा स्थानीय समुदायसँग छलफल गरी, योजनाबद्ध रूपमा अगाडि बढ्नका लागि सुसूचित निर्णय लिनु हो। कार्यक्रमको आयोजना वातावरणीय संरक्षण ऐन, २०७६ र वातावरणीय संरक्षण नियमावली, २०७७ अनुसार गरिएको हो।
