ओखलढुङ्गा । ओखलढुङ्गाको चम्पादेवी गाउँपालिकामा चैत २७ गतेदेखि ३० गतेसम्म चम्पादेवी गाउँपालिका अध्यक्षकप प्रतियोगिता हुने भएको छ । प्रतियोगितामा २० विधामा खेलको प्रतिष्पर्धा गराउने तयारी गरिएको गाउँपालिकाले जनाएको छ ।
गाउँपालिकाको स्वीकृत वार्षिक कार्यक्रमअनुसार सञ्चालन हुन लागेको यो प्रतियोगिताले स्थानीय युवाहरूलाई खेलकुदमा सहभागी हुन र आफ्नो प्रतिभा देखाउने अवसर प्रदान गर्नेछ। चम्पादेवी गाउँपालिकाको ९ नं वडाको दलीडाँडामा रहेको खेल मैदानमा भव्य उद्घाटन समारोहका साथ सुरु हुने प्रतियोगितामा भलिबल, घोडा रेश, भलिबल, तान डोरी, घैंटो फुटाउने, म्युजिक चेयर, भाले झिक्ने, गोरु जुधाइ, सट पुट, दौड, जीवनसाथी बोकेर दौड्ने, हाजिरी जवाफ, वक्तृत्वकला, लोकदोहोरी जस्ता खेलहरू समावेश गरिएका छन्।
प्रतियोगितामा अन्तरपालिकास्तरीय खुला पुरुष भलिबल प्रतियोगितामा प्रथम स्थान हासिल गर्ने टिमलाई २ लाख रुपैयाँ, दोस्रो स्थानलाई १ लाख ५० हजार रुपैयाँ, तेस्रो स्थानलाई १ लाख रुपैयाँ र सान्त्वना स्थानलाई ५० हजार रुपैयाँ प्रदान गरिनेछ। खुला श्रेणीको घोडा रेस प्रतियोगितामा प्रथम हुनेलाई ३० हजार, दोस्रो हुनेलाई २० हजार, तेस्रो हुनेलाई १० हजार र सान्त्वना स्थान हासिल गर्नेलाई ५ हजार रुपैयाँ दिइनेछ। महिला भलिबल प्रतियोगिता चम्पादेवी गाउँपालिकाभित्रका वडास्तरीय टिमका लागि मात्र हुनेछ, जसमा प्रथम हुने टिमले ५० हजार, दोस्रो हुनेले ३५ हजार, तेस्रो हुनेले २० हजार र सान्त्वना स्थान हासिल गर्नेले १० हजार रुपैयाँ पाउनेछन्।
पुरुष तथा महिलाको तान डोरी प्रतियोगितामा प्रथम हुने टिमले २० हजार, दोस्रो हुनेले १२ हजार, तेस्रो हुनेले ७ हजार र सान्त्वना स्थान हासिल गर्नेले ५ हजार रुपैयाँ प्राप्त गर्नेछन्।
घैंटो फुटाउने महिला र भाले झिक्ने महिला तथा पुरुष खेलहरूमा प्रथम स्थान हासिल गर्ने खेलाडीलाई ५ हजार रुपैयाँ प्रदान गरिनेछ। म्युजिकल चियर महिला खेलमा ५ हजार, ३ हजार, २ हजार र १ हजारका दरले पुरस्कार व्यवस्था गरिएको छ ।
प्रतियोगिताको अर्को आकर्षण गोरु जुधाईमा प्रथम पुरस्कार २० हजार, द्वितीय पुरस्कार १० हजार, तृतीय पुरस्कार ५ हजार र शान्त्वना पुरस्कार ५ हजार व्यवस्था गरिएको छ । यस्तै सट पुट (महिला तथा पुरुष), ४०० मिटर दौड (महिला तथा पुरुष), ८०० मिटर दौड (महिला तथा पुरुष), हाजिरी जवाफ, वक्तृत्वकला र लोक दोहोरी, जीवन साथी बोकेर दौड्ने र दौड प्रतियोगिताका खेलमा पनि उचित पुरस्कारको व्यवस्था गरिएको छ ।
भलिबल प्रतियोगिताका लागि भने चैत २६ गतेसम्म टीमदर्ता गरिसक्नुपर्नेछ ।
प्रतियोगिताको टाईसिट चैत २७ गते बिहान ८ बजे निकालिनेछ। खेल प्रचलित नियमअनुसार खेलाइनेछ। प्रत्येक टिममा खेलाडी तथा प्रशिक्षकसहित १० जना हुनुपर्नेछ। खेलाडीहरूले जर्सी र प्रशिक्षक अनिवार्य हुनुपर्नेछ। सहभागी टिमका खेलाडीहरू एउटै गाउँपालिका वा नगरपालिकाभित्रका हुनुपर्नेछन्। टिम दर्ताका लागि सम्बन्धित गाउँपालिका वा नगरपालिकाको पत्र अनिवार्य छ। खेलाडीहरूले आफ्नो नाम, थर, फोटो तथा नागरिकता प्रमाणपत्रको प्रतिलिपि बुझाउनुपर्नेछ। खेलाडीहरूले खाना र बसाइको व्यवस्था आफैं गर्नुपर्नेछ। खेलमा निर्णायक र आयोजकको निर्णय अन्तिम हुने आयोजकले जनाएको छ ।
गाउँपालिकाले खेलकुदलाई प्रोत्साहन गर्न तथा स्थानीय युवाहरूलाई प्रतिभा प्रदर्शन गर्ने अवसर प्रदान गर्न यो प्रतियोगिता आयोजना गरेको जनाएको छ।
चम्पादेवी गाउँपालिका अध्यक्ष नवराज केसीले गाउँपालिका अध्यक्षकप २०८१ लाई खेलकुदको भव्य उत्सवको रुपमा चित्रण गरेका छन्। उनले भने, "यो प्रतियोगिता हाम्रो गाउँपालिकाको लागि एउटा ऐतिहासिक हुनेछ। हामीले खेलकुदलाई प्रोत्साहन गर्न र स्थानीय युवाहरुलाई प्रतिभा प्रदर्शन गर्ने अवसर प्रदान गर्न यो प्रतियोगिता आयोजना गरेका छौं। यसले युवाहरुलाई स्वस्थ प्रतिस्पर्धा र खेलकुदको माध्यमबाट एकसाथ ल्याउनेछ।"
उनले प्रतियोगिताले गाउँपालिकामा खेलकुदको नयाँ लहर ल्याउने अपेक्षा गरिएको बताए। "हामीलाई विश्वास छ, यस प्रतियोगिताले हाम्रो गाउँपालिकामा खेलकुदको नयाँ लहर ल्याउनेछ," केसीले भने, "हामीले खेलकुदलाई मात्र नभई सांस्कृतिक र सामाजिक एकतालाई पनि प्रवर्द्धन गर्ने लक्ष्य राखेका छौं।"
प्रतियोगिताले युवाहरुलाई आफ्नो प्रतिभा देखाउन र स्वस्थ जीवनशैली अपनाउन समेत प्रेरित गर्ने उनको भनाइ छ। केसीले प्रतियोगितालाई सफल बनाउन सबै खेलप्रेमीहरुलाई सहभागी हुन आह्वान गरेका छन्।
हेर्नुस् गाउँपालिकाको विस्तृत सूचना
